विराटनगरलाई ९० रनले हराउँदै सुदूरपश्चिमको सानदार विजयी सुरुवात

काठमाडौं, १८ मंसिर । सुदूरपश्चिम रोयल्सले विराटनगर किंग्सविरुद्ध सानदार जितकासाथ नेपाल प्रिमियर लिगमा आफ्नो सुखद यात्रा आरम्भ गरेको छ । 

विराटनगरलाई ९० रनले पछि पार्दै सुदूरपश्चिमले जित निकालेको हो । सुदूरपश्चिमले दिएको १८३ रनको विशाल लक्ष्य पछ्याएको विराटनगर किंग्सले ९२ मात्रै जोड्यो । विराटनगरका बसिर अहमदले २४, निकोलस किर्टोनले १५ र क्रिस सोलेले १० रन बनाए । अरुले दोहोरो अंकमा रन बनाउन सकेनन् । यो विराटनगरको लगातार दोस्रो पराजय हो ।  यसअघि जनकपुर बोल्टसँग ८ विकेटले हार व्यहोरेको थियो ।

आक्रामक ब्याटिङ गरेको सुदूरपश्चिमले बलिङमा पनि उत्कृष्ट प्रदर्शन गरेपछि विराटनगर निरिह बन्यो । विराटनगरविरुद्ध फराकिलो जीत दर्ज गर्नेक्रममा अविनाश बोहोरा र स्कटले तीनरतीन विकेट हात पारे । ब्रान्डन, इशान पाण्डे र सैफ जैबले एक/एक विकेट झारे ।

यसअघि टस हारेर ब्याटिङको आमन्त्रण पाएको सुदूरपश्चिमले कप्तान दीपेन्द्र सिंह ऐरीको आक्रमक ब्याटिङमा १८२ रनको योगफल बनाएको थियो । 

अन्तिम दुई बलमा लगातार छक्का प्रहार गर्दै कप्तान ऐरीले सानदार फिनिसिङ गरे । उनले १९.५ ओभरमा छक्का प्रहार गर्दै अर्धशतक पूरा गरे । अन्तिम बलमा पनि छक्का हानेपछि दीपेन्द्रले २४ बलमा अविजित ५७ रन जोडे । उनले ३ चौका र ५ छक्का प्रहार गरे । उनले बाउन्ड्रीबाट ४२ रन बनाएका थिए ।

सुदूरपश्चिमले ७ विकेट गुमाएर १८२ रन बनाएको हो । कप्तान दीपेन्द्रसिंह ऐरीले ५७, ब्रान्डनले ३६, बिनोद भण्डारीले २३, इशान पाण्डेले २१, सैफ जैबले १४, स्कटले १० रनको योगदान दिए । विराटनगरका अनिल खरेलले तीन, क्रिस सोले, इस्मत अलाम र बसिर अहमेदले एकरएक विकेट लिन सफल रहे ।