चितवनको लगातार दोस्रो जित, पोखरा ८७ रनले पराजित

काठमाडौं, १८ मंसिर । चितवन राइनोजले नेपाल प्रिमियर लिगमा लगातार दोस्रो जित निकालेको छ । ब्याटिङमा रवि बोपाराको अर्धशतक तथा बलिङमा सोहेल तनविर र रिजन ढकालको उत्कृष्ट प्रदर्शनको मद्दतमा मंगलबार भएको दिनको दोस्रो खेलमा चितवनले पोखरालाई ८७ रनले पराजित गरेको हो ।

तनविर, रिजन र लुक बेन्केन्सटेइनले ३/३ विकेट लिएपछि १६२ रनको लक्ष्य पछ्याएको पोखरा १३.२ ओभरमा ७४ रनमा समेटियो । 

पोखराका लागि लोअर अर्डरमा आएका नारायण जोशीले सर्वाधिक ३० रन बनाए । त्यसबाहेक अन्य खेलाडीले राम्रो प्रदर्शन गर्न सकेनन् । जोशीले २४ बल खेल्दै ३ चौका र २ छक्का प्रहार गरे । म्याट क्रिटलेले १७ रन बनाए ।

पोखरालाई अलआउट गर्न चितवनका तनविरले ३ ओभरमा १ मेडन राख्दै ६ रन मात्र खर्चेर ३ विकेट झारे । रिजनले पनि ३ ओभरमा १ मेडन राख्नदै १० रन खर्चेर ३ विकेट लिए । लुकले ४ ओभरमा ३७ रन खर्चेर ३ विकेट लिए । दिपक बोहराले १ विकेट लिए ।