जयकिशन र बासिस्टोको अर्धशतकमा कर्णालीले चितवनलाई दियो १७६ रनको लक्ष्य

काठमाडौं, ३ पुस ।  नेपाल प्रिमियर लिग (एनपीएल) को एलिमिनेटरमा कर्णाली याक्सले चितवन राइनोजलाई १७६ रनको लक्ष्य दिएको छ ।

टीयू अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको कर्णाली याक्सले ६ विकेट गुमाएर १७५ रन बनाएको हो ।

जयकिसन कोल्सावाला र विलियम बोसिस्टोको अर्धशतक प्रहार गरेर कर्णालीलाई सो योगफल तय गर्न महत्वपूर्ण योगदान दिए ।

एनपीएलमा पहिलो खेल खेलेका कोल्सावालाले ३९ बल खेल्दै ६ चौका र २ छक्का मद्दतमा सर्वाधिक ५३ रन बनाए ।

यस्तै, बोसिस्टोले ३९ बल नै खेल्दै ३ चौका र २ छक्का मद्दतमा ५२ रन जोडे ।  चाडविक वाल्टनले अविजित ४६ रन बनाए । २३ बल खेलेका उनले ४ चौका र ३ छक्का प्रहार गरे । जिसन मक्सुदले १४ रन योगदान गरे । ओपनर रित गौतम र गुल्सन झाले खाता खोल्न सकेनन् ।

बलिङमा चितवनका सोहेल तनविरले २ तथा रवि बोपारा र कप्तान कुशल मल्लले समान एक/एक विकेट लिए ।

यस खेलको विजेता क्वालिफायर टु मा पुग्नेछ भने हार्ने टोली बाहिरिनेछ । लिग चरणमा कर्णालीले चितवनलाई यसअघि पराजित गरेको थियो ।