‘बाइरो तेस्रो अल ब्रिड च्याम्पियनसिप डग शो’को तयारी पूरा
काठमाडौँ, २ माघ । केनेल क्लब अफ नेपालद्वारा आयोजित ‘बाइरो तेस्रो ब्रिड च्याम्पियनसिप डग शो’ को तयारी पूरा भएको बताइएको छ ।
उक्त कार्यक्रमबारे जानकारी दिन आयोजित पत्रकार सम्मेलनमा संयोजक बैशाली डंगोलले कार्यक्रमको सम्पूर्ण तयारी पूरा भइसकेको जानकारी गराएकी हुन् । उनले यस पटक डिजिटल मार्केटिङको माध्यमबाट धेरै दर्शक र सहभागीहरूसम्म पुग्न सफल भएको बताइन् ।
कार्यक्रमको आयोजक केनेल क्लब नेपालका सचिब विवेश श्रेष्ठले सबैलाई शोमा सहभागी हुन आग्रह गर्दै प्रायोजक र समर्थकहरूलाई धन्यवाद व्यक्त गरे ।
ब्रीड निर्णायक मिस्टर सञ्जय गुरुङले वर्ल्ड केनेल युनियनको मापदण्ड अनुसार कुकुरहरूको मूल्याङ्कन गरिने बताए । प्रायोजक बाइरोका तर्फबाट सुरेश शाहले कुकुरको उच्च नस्लको संरक्षण र प्रबर्द्धनका लागि यस्ता शोहरू महत्त्वपूर्ण हुने बताए ।
आधिकारिक साझेदारका तर्फबाट रामप्रसाद न्यौपानेले आफूहरू पशुसम्बन्धी सामाजिक कार्यहरूमा सक्रिय रहेको र यो डग शोको भागिदार हुन पाउँदा खुशी लागेको बताए ।
यस शोले कुकुरको उच्च नस्लको संरक्षण र प्रबर्द्धनमा महत्त्वपूर्ण योगदान पुर्याउने आयोजकहरूको विश्वास छ । कार्यक्रम माघ ५ गते जाउलाखेल फुटबल ग्राउण्डमा आयोजना हुनेछ ।
