नबिल बैंकको नबिल एसएसई फेलोसिप कार्यक्रम सम्पन्न

काठमाडौं, २७ माघ । नबिल बैंक लिमिटेडले नबिल स्कुल अफ सोसल इन्टरप्रेनरसिप (नबिल एसएसई) अन्तर्गत सञ्चालित फेलोसिप कार्यक्रमको ‘Celebrating Fellowship, Journey of Impacts’ कार्यक्रम सम्पन्न गरेको छ।

बिहीबार कीर्तिपुरस्थित त्रिभुवन विश्वविद्यालयमा आयोजित कार्यक्रममा फेलोसिपका दोस्रो र तेस्रो समूहका सहभागीहरूलाई प्रमाणपत्र प्रदान गर्दै बिदाइ गरियो भने चौथो समूहका सहभागीहरूलाई स्वागत गरियो। नबिल बैंकले त्रिभुवन विश्वविद्यालय व्यवस्थापन संकायअन्तर्गत स्कुल अफ म्यानेजमेन्टसँगको सहकार्यमा तीन वर्षदेखि समाजमा उद्यमशीलताको माध्यमबाट सामाजिक समस्याको समाधान गर्ने उद्देश्यले यो कार्यक्रम सञ्चालन गर्दै आएको छ।

कार्यक्रममा फेलोसिप सहभागीहरूले उद्यममार्फत प्राप्त उपलब्धि, प्रशिक्षकहरूको योगदान तथा कार्यक्रमको प्रभावबारे अनुभव बाँडे। त्रिवि व्यवस्थापन संकाय डिन प्रा. डा. महानन्द चालिसेले यस कार्यक्रमलाई समाजमा परिवर्तन ल्याउने महत्वपूर्ण पहल भन्दै थप विस्तार गर्न सकिने बताए। त्रिवि उपकुलपति प्रा. डा. केशरजंग बरालले उद्यमशीलता प्रवर्द्धनका लागि शैक्षिक संस्था र उद्योगबीच सहकार्य आवश्यक रहेको धारणा राखे।

नबिल बैंकका निर्देशक निर्वाण चौधरीले कार्यक्रमले नेपाली युवालाई रोजगारदाता बन्न प्रेरित गरिरहेको बताए। नबिल बैंकका सीईओ ज्ञानेन्द्रप्रसाद ढुंगानाका अनुसार, हालसम्म ४५ उद्यम स्थापना भई १,२०० भन्दा बढी रोजगारी सिर्जना भइसकेको छ।

कार्यक्रममा फेलोहरूले आफ्ना उत्पादन प्रदर्शनी र बिक्रीका लागि २० भन्दा बढी स्टलहरू राखेका थिए। नबिल एसएसईले उद्यमशीलता विकास गर्न आवश्यक व्यावहारिक तालिम, मार्गदर्शन, सञ्जाल विस्तार, र वित्तीय पहुँचमा सहयोग गरिरहेको छ।

हाल नबिल एसएसई अन्तर्गत फेलोसिप प्रोग्राम र सर्टिफिकेट कोर्स सञ्चालन भइरहेका छन्। हालसम्म ११७ उद्यम स्थापना भई १,२०० भन्दा बढी रोजगारी सृजना भइसकेको बैंकले जनाएको छ। सर्टिफिकेट कोर्स सातै प्रदेशका ११ शैक्षिक संस्थामार्फत सञ्चालन भइरहेको छ।

नबिल बैंकले संस्थागत सामाजिक उत्तरदायित्व अन्तर्गत उद्यमशीलताको प्रवर्द्धन गर्दै भविष्यमा पनि कार्यक्रमलाई निरन्तरता दिने प्रतिबद्धता जनाएको छ।