बेलायती राजाले दिए राष्ट्रपति पौडेललाई शुभकामना
काठमाडौं । बेलायतका राजा चार्ल्स तृतीयले नेपालको संविधान दिवसका अवसरमा राष्ट्रपति रामचन्द्र पौडेलमार्फत नेपाली जनताप्रति शुभकामना व्यक्त गरेका छन् । बेलायती राजाको शुभकामना काठमाडौँस्थित बेलायती राजदूतावासमार्फत राष्ट्रपति पौडेललाई बुझाइएको हो ।
राजा चार्ल्सले आफू र आफ्नो श्रीमती तर्फबाट शुभकामना सन्देश दिँदै हाल नेपालले सामना गरिरहेका चुनौतीपूर्ण परिस्थितिमा सहानुभूति समेत प्रकट गरेका छन् । उनले हालै भएको जनधनको क्षति र नेपालीले व्यहोर्नु परेको कठिनाइमा दुःख प्रकट गर्दै पीडित परिवारप्रति समवेदना व्यक्त गरेका छन् ।
‘यो कठिन समयमा नेपाली जनताको अदम्य साहस र आत्मबल प्रेरणादायी छ,’ सन्देशमा भनिएको छ । राजा चार्ल्सले नेपालको संविधानमा निहित शान्ति, लोकतन्त्र र समावेशी मूल्यहरू अझै पनि उत्तिकै महत्त्वपूर्ण रहेको उल्लेख गर्दै आगामी दिनमा ती मूल्यहरूले राष्ट्रलाई सुरक्षित र समृद्ध भविष्यतर्फ डोर्याउने विश्वास व्यक्त गरेका छन् ।
सन् २०२६ मा हुने निर्वाचनलाई इङ्गित गर्दै उनले नेपाल त्यसतर्फ अघि बढिरहेकोमा शुभेच्छा समेत व्यक्त गरे ।
‘म र मेरी पत्नीले तपाईंलाई र सबै नेपालीलाई हार्दिक शुभकामना व्यक्त गर्दछौँ । आगामी वर्ष आन्दोलनका घाइतेहरूको उपचार, शक्ति र नयाँ आशा प्राप्त होस्’ राजाको सन्देशमा उल्लेख छ ।
