बागमती प्रदेशसभा : रिक्त सभामुखमा जुटेन सहमति, बैठक सञ्चालन अनिश्चित
हेटौंडा। बागमती प्रदेशसभाको रिक्त सभामुख पदमा सत्तारुढ दलभित्र सहमति जुट्न नसक्दा प्रदेशसभा सञ्चालन अनिश्चित बनेको छ। नेपाली कांग्रेस, सत्ता साझेदार दल नेकपा एमाले र प्रमुख प्रतिपक्षी दल नेकपा माओवादी केन्द्रबीच सभामुख नियुक्तिका विषयमा दाबी जारी छ।
सभामुख भुवनकुमार पाठकले २४ भदौमा जेनजी प्रदर्शनको समय सामाजिक सञ्जालमार्फत राजीनामा घोषणा गरेपछि १ असोजमा उपसभामुख अप्सरा चापागाईंलाई राजीनामा बुझाएका थिए। पाठक राप्रपा दलबाट सभामुख बनेका थिए भने उपसभामुख अप्सरा चापागाईं एमालेकी हुन्।
सरकारको प्रवक्ता एवं आर्थिक मामिला तथा योजनामन्त्री प्रभात तामाङका अनुसार, प्रदेशसभा बसेको १५ दिनभित्र सभामुख चयन गर्नुपर्ने संवैधानिक प्रावधान भए पनि सहमति नभएको कारण प्रदेशसभा बैठक बस्न सकेको छैन।
एमालेबाट सरकारको नेतृत्व गर्ने कृषि तथा पशुपन्छी विकासमन्त्री मधुसुदन पौडेलले भने, “राजनीतिक व्यवस्थाका कारण सहमति ढिलाई भइरहेको छ। जेनजी प्रदर्शनका क्रममा प्रदेशसभा भवनमा क्षति भएपछि नयाँ बैठक स्थल व्यवस्थापनमा पनि समय लागिरहेको छ।”
कांग्रेस ठूलो दल भएकाले सभामुख पदमा दाबी गर्न सक्ने बताएको छ भने एमालेले उपसभामुख अप्सरा चापागाईंलाई सभामुख बनाएर प्रक्रिया अघि बढाउने प्रस्ताव राखेको छ। माओवादी केन्द्रले भने सरकार बाहिरको दललाई सभामुख दिनुपर्ने तर्क राख्दै, सरकारलाई रचनात्मक सहयोग उपलब्ध गराउन तयार रहेको जनाएको छ।
हाल प्रदेशसभा छैठौं अधिवेशनअन्तर्गत गत १७ भदौपछि बैठक बसेको छैन। जेनजी प्रदर्शनका क्रममा प्रदेशसभा सचिवालय भवन र नवनिर्मित सभाहलमा आगलागीले क्षति पुर्याएको थियो।
सरकारले हेटौंडा–२ स्थित पुरानो सभाहलबाट प्रदेशसभा सञ्चालन गर्ने तयारी गरिरहेको छ। मकवानपुरका इन्जिनियर राजन गौतमका अनुसार, सभाहलको मर्मतसम्भारमा १९ लाख रुपैयाँ खर्च भएको छ, तर कुर्सी र विद्युतीय उपकरणको व्यवस्थापन अझै सम्पन्न भएको छैन।
