कुटनीतिक नियोगका प्रतिनिधिहरूलाई निर्वाचन अवलोकन गर्न दिइने
काठमाडौं । निर्वाचन आयोगले आसन्न प्रतिनिधि सभा सदस्य निर्वाचनको तयारी र प्रक्रियाका बारेमा अन्तर्राष्ट्रिय समुदायलाई जानकारी गराएको छ ।
बिहीबार निर्वाचन आयोगले नेपालमा रहेका सबै कुटनीतिक नियोगका प्रमुख र प्रतिनिधिहरूलाई निर्वाचनबारे जानकारी गराएको हो ।
आयोगका प्रवक्ता नारायणप्रसाद भट्टराईका अनुसार निर्वाचन केवल आन्तरिक सरोकारको विषय मात्र नभई अन्तर्राष्ट्रिय समुदायको पनि चासोको विषय हुने भएकाले नेपालको निर्वाचनमा विश्व समुदायको सकारात्मक सहयोग र सहभागिताका लागि ‘ब्रिफिङ’ गरिएको हो ।
‘कुनैपनि देशको निर्वाचन त्यो देशको सरोकार मात्र नभएर अन्तर्राष्ट्रिय समुदायको पनि सरोकारको विषय हुन्छ । त्यस हिसाबले नेपालमा हुन लागेको यो प्रतिनिधिसभा सदस्य निर्वाचनमा अन्तर्राष्ट्रिय समुदायको पनि चासो छ,’ उनले भने, ‘उहाँहरूले हामीलाई सहयोग पनि गरिरहनुभएको छ र यहाँका गतिविधिहरूलाई उहाँहरूले पर्यवेक्षकको आँखाबाट पनि हेरिरहनुभएको छ । त्यसैले विगतदेखिकै परम्परालाई निरन्तरता दिएर हामीले आज यो कार्यक्रम गरेका हौं ।’
नेपालमा रहेका सबै विदेशी दुतावास, संयुक्त राष्ट्रसंघीय निकाय र विकास साझेदारहरूलाई निर्वाचनका गतिविधिबारे जानकारी (ब्रिफिङ) गराउने परम्परा विगतदेखि नै रहेको आयोगले जनाएको छ ।
ब्रिफिङपछि न्युज एजेन्सी नेपालसँग कुरा गर्दै आयोगका प्रवक्ता भट्टराईले कूटनीतिक समुदायलाई निर्वाचनका बारेमा सत्य–तथ्य जानकारी लिन–दिन र पर्यवेक्षणका लागि आवश्यक तयारी गर्न यसले सहज हुने बताए ।
‘सामान्यतया: मतदानको दिनभन्दा हप्ता–दश दिन अगाडि यो सम्पन्न गर्ने गरिन्छ । त्यही अनुसार आज हामीले नेपालमा दूतावास भएका सबै कुटनीतिक निकाय, संयुक्त राष्ट्रसंघीय निकायहरू र हाम्रा विकास साझेदारहरूलाई निर्वाचनको बारेमा तथ्य र तथ्याङ्क (फ्याक्ट एण्ड फिगर), अहिलेसम्मका कामहरू, अब के हुँदैछ र उहाँहरूले निर्वाचनको पर्यवेक्षण गर्दा ध्यान दिनुपर्ने कुराहरू के–के हुन् भन्नेबारे जानकारी गराएका छौं,’ उनले भने ।
एनले सवारी साधनको प्रयोग, आवागमन (मुभमेण्ट) र परिचयपत्रको व्यवस्थाबारे पनि कुटनीतिक समुदायलाई स्पष्ट पारिएको बताउँदै यसले नेपालको निर्वाचनका बारेमा अन्तर्राष्ट्रिय रूपमा एउटै बुझाइ बनाउन सहयोग पुग्ने विश्वास व्यक्त गरे ।
