कैलालीमा युवक हत्या प्रकरणमा ४ जना पक्राउ

धनगढी, १३ कात्तिक । कैलालीमा जुवा खेलिरहँदा भागेर बेपत्ता भएका भनिएका एक जनाको ज्यान गएको घटनामा चार जना पक्राउ परेका छन् ।

गत शुक्रबार राति गोदावरी नगरपालिका–१२ को ओलानीस्थित कोल्मुडामा जुवा खेल्ने क्रममा सम्पर्कविहीन भएका करण बिकको मृत्यु घटनामा प्रहरीले चार जनालाई नियन्त्रणमा लिएको हो । 

इलाका प्रहरी कार्यालय मालाखेतीका प्रमुख प्रहरी नायब उपरीक्षक (डीएसपी) गंगाबहादुर थापाका अनुसार, पक्राउ पर्नेमा गोदावरी नगरपालिका–१२ ओलानीका प्रकाश साउँद, पूरण मलासी, गणेश बिक र गंगा साउँद रहेका छन् ।

मृतक बिकका परिवारले उनीसँगै रहेका चारै जनाविरुद्ध ज्यान सम्बन्धी मुद्दामा किटानी जाहेरी दिएपछि पक्राउ गरिएको डीएसपी थापाको भनाइ छ । 

उनीहरुमाथि थप अनुसन्धान भइरहेको प्रहरीले जनाएको छ ।