उपचुनावमा कांग्रेस,एमाले र माओवादीलाई पराजित गर्नुपर्छ: राजेन्द्र लिङ्देन

काठमाडौं, १३ कात्तिक । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आगामी उपनिर्वाचनमा आम मतदाताले कांग्रेस, एमाले र माओवादी केन्द्रलाई पराजित गर्नुपर्ने बताएका छन् ।

पार्टीको कीर्तिपुर नगर कमिटीद्वारा मंगलबार आयोजित कार्यक्रमलाई सम्बन्धोन गर्दै उनले यस्तो बताएका हुन् । 

ठूला पार्टी भ्रष्ट भएको र उनीहरुले देशलाई बर्बाद बनाएकाले आगामी उपनिर्वाचनमा जनताले उनीहरुलाई पराजित गर्नुपर्ने उनले जिकिर गरे ।

‘यो उपनिर्वाचनमा राप्रपाले नजितेर कसले जित्छ त ? राप्रपालाई भोट नदिएर त्यही काँग्रेसलाई दिने, त्यही एमालेलाई दिने, त्यही माओवादीलाई भोट दिने ? देश यत्रो बर्बाद भयो । अनि यो बर्बादीमा आफैं सहभागी हुने ?’ उनले भने । 

राष्ट्रिय स्वतन्त्र पार्टीतर्फ संकेत गर्दै उनले हावादारी पार्टी भने । ‘उसको फेद के हो, टुप्पो के हो ? केही पनि थाहा छैन । कुनै अनुभव पनि छैन । भोलि उसले जित्यो भने के गर्छ ?  त्यो पनि थाहा छैन । त्यसै विकल्प भनेर हावामा भोट दिएर फेरि बाँकी समय बर्बाद गर्ने ?’, राप्रपा अध्यक्ष लिङ्देनले भने ।