प्रधानमन्त्रीभन्दा अघि चीन भ्रमणमा जाँदै परराष्ट्र मन्त्री राणा

काठमाडौं, १० मंसिर । प्रधानमन्त्री केपी शर्मा ओली भन्दा अगाडि परराष्ट्रमन्त्री आरजु राणा देउवा चीन जाने तयारी भएको छ ।  प्रधानमन्त्रीको चीन भ्रमण तयारीका लागि परराष्ट्रमन्त्री राणा चीन जान लागेकी हुन् ।

आफू बुधबार पछि चीन जान लागेको सोमबार प्रधानमन्त्री ओलीले आयोजना गरेको छलफलकामा जानकारी दिइन् ।  ‘म यो भ्रमणको पूर्व तयारीको लागि दुई दिन पछि जाँदै छु,’ उनले भनिन् ।

स्रोतका अनुसार उनी मंसिर १३ गते बेइजिङ जाने तयारीमा छिन् । उनले १४ गते समकक्षी वाङ यीसँग भेटवार्ता गर्ने कार्यक्रम तय गरिएको बताइएको छ  ।

परराष्ट्र मन्त्रालयले प्रधानमन्त्री ओलीको चीन भ्रमणको कार्यक्रम तालिका बनाइसकेको छ ।  प्रस्तावित तालिका अनुसार, प्रधानमन्त्री ओली मंसिर १७ गते चीन भ्रमणमा जानेछन् ।

प्रस्तावित तालिका अनुमोदन गर्न आज साँझ पाँच बजे मन्त्रिपरिषद् बैठक प्रधानमन्त्री ओलीले डाँकेका छन् ।