प्रचण्डले हप्तामा एकपटक कांग्रेसबाट प्रधानमन्त्री बनिदिनुस् भनेर खबर पठाउनुहुन्छ: गगन थापा

काठमाडौं, १३ मंसिर । नेपाली कांग्रेसका महामन्त्री गगनकुमार थापाले विपक्षी दलका नेता नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले प्रधानमन्त्री बनिदिनुस् भन्दै हप्तामा एक पटक खबर पठाइरहेको दाबी गरेका छन्।

बिहीबार कीर्तिपुरमा आयोजित उपनिर्वाचनको अन्तिम चुनावी सभालाई सम्बोधनका क्रममा थापाले वर्तमान गठबन्धन फुटाउन प्रचण्डले गरिरहेको प्रयासबारे खुलासा गरेका हुन् ।

भ्रष्टाचारीको संरक्षण गर्न कांग्रेस–एमाले गठबन्धन सरकार बनेको भनेर प्रचण्डले लगाउने आरोपको पनि थापाले खण्डन गरे ।

‘प्रचण्डले अहिले भर्खरै भनेर जानुभएछ, यो यो कारणले सरकार फेरियो । कांग्रेस अहिले पनि संसद्को सबैभन्दा ठूलो पार्टी हो । अहिले पनि प्रचण्डले हप्तामा एक पटक कांग्रेसलाई खबर पठाउनुहुन्छ-लौन प्रधानमन्त्री बनिदिनुस् भन्दै’, थापाले भने ।

उनले कार्यकर्तालाई कांग्रेसले राजनीतिक स्थिरता चाहेकाले ०८४ सम्म एमालेसँग मिलेर अगाडि बढ्ने बताए  ।