रवि लामिछानेसहित विरुद्धको मुद्दा न्यायाधीश राईको इजलासमा

काठमाडौं, ८ पुस । रास्वपाका सभापति रवि लामिछानेसहित ५ जनाको मुद्दामाथिको बहस न्यायाधीश नीतिज राईको इजलासमा हुने भएको छ ।

बयानका लागि  पूर्वगृहमन्त्री समेत रहेका लामिछानेसहित पाँचै जनालाई कास्की जिल्ला अदालतमा उपस्थित गराइएको छ ।

लामिछानेसहित पूर्वडीआईजी छविलाल जोशी, जीबी राईका साझेदार नेचर हर्ब्सका रामबहादुर खनाल, लिला पछाइँ र सूर्यदर्शन सहकारीका सञ्चालक कृष्ण गुरूङलाई अदालतमा उपस्थित गराइएको हो ।

उनीहरुविरुद्ध सहकारी ठगी, संगठित अपराध र सम्पत्ति शुद्धीकरणको मुद्दा आइतबार दायर गरिएको थियो । आजदेखि बयान थालिएको हो । त्यसपछि थुनछेक बहस हुने अदालतले जनाएको छ ।

थुनछेक बहसपछि न्यायाधीशले थुनामा राख्ने, धरौटी माग्ने वा सामान्य तारिखमा छाड्ने भन्ने विकल्पमध्ये एउटा निर्णय अदालतले लिनेछ ।  

प्रहरीले रविसहितमाथि विभिन्न सहकारीको बचत हिनामिना गरेको अभियोगमा एक अर्ब ५१ करोड रुपैयाँ बिगो मागदाबी सहित सहकारी ठगी मुद्दा चलाइएको छ ।

संगठित समूह बनाएर योजनाबद्ध रूपमा ठगी गरेको आरोपमा उनीहरूमाथि संगठित अपराधको आरोप पनि उनीहरुमाथि लगाइएको छ ।