मोरङको मालती पुलमा ४ वटा सिलिन्डर बम फेला

विराटनगर, २५ पुस ।  पूर्वपश्चिम राजमार्गका मोरङको सुन्दरहरैँचा नगरपालिका– ७ स्थित मालती पुल नजिकै गाडिएको अवस्थामा ४ वटा सिलिन्डर बम भेटिएका छन् । प्रहरीले पूर्वपश्चिम राजमार्गमा ४ वटा सिलिन्डर बम फेला परेको जनाएको हो । 

मोरङका प्रहरी प्रवक्ता डीएसपी वेदप्रकाश जोशीले राजमार्गमा गाडिएको अवस्थामा भेटिएको बम द्वन्द्वकालकै भएको जानकारी दिए । बिहान जिल्ला प्रशासन कार्यालय मोरङमा सुन्दरहैँचा– ७ को मालती पुल आसपास द्वन्द्वकालको बम रहेको सूचना आएको थियो ।

राजमार्ग विस्तारको क्रममा उत्खनन गर्दा पड्किन सक्ने जोखिम रहेको भन्दै जानकारी प्राप्त भएपछि नेपाली सेना र प्रहरीको टोली खोजी कार्यका लागि परिचालन गरिएको थियो ।

प्रहरीले बम रहेको सूचना आएपछि राजमार्ग बन्द गरेर बमको खोजी गरेको थियो । खोजी गर्ने क्रममा दिउँसो बम फेला पारेको बताइएको छ ।