राप्रपा नेताहरूको रिहा गर्न माग गर्दै माइतीघरमा प्रदर्शन

काठमाडौं । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्र र महामन्त्री धवल शम्शेर राणा लगायतलाई रिहा गर्न माग गर्दै राप्रपाले प्रदर्शन गरेको छ । सम्पूर्ण संयोजित संगठन राप्रपाले सोमबार दिउँसो नेताहरूको रिहाइको माग गर्दै काठमाडौंमा प्रदर्शन गरेका हुन्।

काठमाडौंको तीनकुने घटनामा राज्य पक्षले दमन गरेको भन्दै उनीहरूले प्रदर्शन गरेका हुन् ।

झुटा मुद्दामा पक्राउ परेका राप्रपाका नेता लगायत सम्पूर्ण राष्ट्रवादीहरूलाई अविलम्ब रिहाको माग राखेर उनीहरूले प्रदर्शन गरेका हुन् ।

उनीहरूले प्रदर्शनका क्रममा मृत्यु भएकालाई शहीद घोषणा गर्नुपर्ने, घाइतेहरूको निःशुल्क र प्रभावकारी उपचारको व्यवस्था गर्नुपर्ने, घटनाको न्यायिक समिति बनाइ छानबिन गर्नुपर्ने लगायत माग राखेका छन् ।

तीनकुने-कोटेश्वर-जडिबुटी क्षेत्रमा चैत १५ गते तोडफोड, आगजनी र लुटपाट भएको थियो। दुई जनाको मृत्यु भएको थियो। प्रदर्शनकारी र प्रहरीहरू घाइते भएका थिए।