कार्यबाहक प्रधानमन्त्रीले शिक्षा विधेयकमा छलफल गर्न शिक्षामन्त्री र संसदीय समितिलाई बोलाए

काठमाडौं, २१ चैत – कार्यवाहक (कामु) प्रधानमन्त्री प्रकाशमान सिंहले शिक्षा विधेयकसम्बन्धी महत्वपूर्ण छलफल गर्न शिक्षा, विज्ञान तथा प्रविधि मन्त्री, प्रतिनिधि सभाको शिक्षा समितिका सांसदहरूलाई बोलाएका छन्। छलफल आज दिउँसो ४ बजे बस्ने तय भएको छ। कामु प्रधानमन्त्रीको सचिवालयका अनुसार छलफलमा गृहमन्त्रीको समेत सहभागिता रहनेछ।

शिक्षा विधेयकको हालसम्मको प्रगतिबारे समीक्षा गर्दै, शिक्षकहरूको माग र सरोकारका विषयमा समेत जानकारी लिन प्रधानमन्त्री सिंहले सरोकारवालाहरूसँग प्रत्यक्ष परामर्श गर्न लागेको जनाइएको छ। संसदको शिक्षा समितिमा विधेयकमाथि छलफल भइरहेको छ भने समितिले उपसमिति गठन गरी विधेयकलाई अगाडि बढाइरहेको छ। तथापि, विद्यालय शिक्षा ऐन छिटो जारी गर्नुपर्ने माग राख्दै शिक्षकहरू आन्दोलनरत छन्।

नयाँ शैक्षिक सत्र सुरु हुने समय नजिकिँदै गर्दा शिक्षकहरूको आन्दोलनले विद्यालय व्यवस्थापनमा प्रत्यक्ष असर गर्ने देखिएको छ। सरकारको ध्यानाकर्षण गराउन शिक्षकहरूले बुधबारदेखि काठमाडौंमा प्रदर्शन गरिरहेका छन्। यही सन्दर्भलाई ध्यानमा राख्दै सरकारले तिव्र रूपमा सम्बद्ध पक्षहरूसँग छलफल थालनी गरेको हो।

सरोकारवालासँगको विस्तृत छलफलपछि सरकारले आन्दोलनरत शिक्षकहरूसँग वार्ता गर्ने तयारी गरिरहेको छ। सरकार र शिक्षकबीच संवादको सेतु निर्माण गर्ने उद्देश्यले कामु प्रधानमन्त्री सिंहले यस बैठकको आयोजना गरेका हुन्। छलफलमा विधेयकको वर्तमान अवस्था, शिक्षकहरूको प्रमुख माग, र यसलाई समाधान गर्न सकिने सम्भाव्य उपायबारे गहन विमर्श हुने अपेक्षा गरिएको छ।