जेनजी आन्दोलनमा भाइरल रगत लतपतिएको जुत्ता खुश्बु ओलीको सारीमा देखियो, भन्छिनः यो विर आत्माहरुप्रतिको सम्झना हो
काठमाडौ । जेनजी आन्दोलनमा भाइरल भएको रगत लतपतिएको जुत्ता राष्ट्रिय प्रजातन्त्र पार्टीकी नेतृ खुश्बु ओलीको सारीमा देखिएको छ ।
उनले उक्त जुत्ता प्रिन्ट गरिएको सेतो साडीमा राष्ट्रिय झण्डा बोकेको तस्बिर सामाजिक सञ्जालमा राखेकी छन् । उनले उक्त सारी लगाउनुको कारण समेत लामो स्ट्याटस मार्फत प्रष्ट पारेकी छन् ।
सामाजिक सञ्जालमा लेखेकी छन्, 'मैले लगाएको सारी केवल एक पहिरन मात्र होइन, यो जेनजी आन्दोलनका वीर आत्माहरूप्रति हृदयदेखिको सम्झना, कृतज्ञता र निःशब्द सम्मानको प्रतीक हो। यो मैले तिनै साहशी शहीदहरूलाई समर्पित गरेर लगाएकी हुँ, जसले आफ्नो अमूल्य जीवन बलिदान दिए, तिनै घाइतेहरूलाई, जो आज पनि अस्पताल र घरमा पीडासँग बाँचेका छन्।'
उनले भनेकी छन्, 'विद्रोही चिंगारीकै कारण अचानक राष्ट्रमा एउटा सुति रहेको चेतना जागृत भयो। गल्ती कहाँ भयो, र सुधार कहाँबाट सुरु हुनुपर्छ भन्ने बोध फेरि सबै माझ ताजा भयो ।'
