हर्क साम्पाङको अभिव्यक्तिप्रति गृहमन्त्री लेखकलाई ध्यानाकर्षणपत्र

काठमाडौं, २१ मंसिर । सुनसरीको धरान उपमहानगरपालिकाका मेयर हर्क साम्पाङले पत्रकारविरुद्ध दिएको अभिव्यक्तिप्रति आपत्ति जनाउँदै गृहमन्त्री रमेश लेखकलाई ध्यानाकर्षण पत्र बुझाइएको छ ।

आज (शुक्रबार) धरान पुगेका गृहमन्त्रीसँग भेटका क्रममा सुनसरीका पत्रकारहरूले ध्यानाकर्षण पत्र बुझाएका हुन् ।  ध्यानाकर्षणपत्र बुझ्दै गृहमन्त्री लेखकले आफू पूर्ण प्रेस स्वतन्त्रताको पक्षमा रहेको बताएका थिए ।

‘ध्यानाकर्षणपत्र बुझ्दै लेखकले भने, ‘लोकतन्त्रमा प्रेस पूर्ण स्वतन्त्र हुनुपर्छ । लोकतन्त्र र प्रेस एक अर्काका परिपूरक हुन् । प्रेस स्वतन्त्रता रहेपछि लोकतन्त्र जीवन्त रहन्छ ।,’  उक्त कार्यक्रममा कोशी प्रदेशका डीआईजी चन्द्रकुवेर खापुङ पनि सँगै थिए ।

खोज पत्रकारिता केन्द्रका लागि धरानका पत्रकार गोपाल दाहालले ‘हर्क साम्पाङको मनमौजी शासन, बेथितिको दलदलमा धरान’ शीर्षकमा मेयर साम्पाङको कार्यशैलीबारे विस्तृत रिपोर्ट सार्वजनिक गरेका थिए ।

तर, साम्पाङले सामाजिक सञ्जालमा सार्वजनिक सामाचारको एउटा सानो अंशलाई लिएर बिहीबार धम्कीपूर्ण अभिव्यक्ति दिएका थिए । ‘नत्र तँ ‘को यस्तो बेइज्जत गर्छु कि शीर ठाडो पारेर हिँड्न सक्दैनस् नेपालमा । निकै फुरफुर गरिस् तिमेरूले ऐना हेर्दा थुक्ने बनाइदिन भने मेरो नाम हर्क साम्पाङ होइन’ उक्त रिपोर्टपछि मेयर साम्पाङले भनेका थिए ।

यसको आधा घण्टापछि उनले फेरि फेसबुकमार्फत निर्देशनात्मक सन्देशमा, ‘खोज पत्रकारिता केन्द्रका गोपाल दाहाल या कोही प्रतिनिधि भोलि १० बजे तुरुन्तै धरान–१८ को ग्रीन टीमा हाजिर हुनु अन्यथा तेरो खोज पत्रकारिताको अन्त्य गरिनछ, भने मेरो नाम हर्क साम्पाङ होइन ।’

बिहीबार मेयर साम्पाङले पत्रकार सम्मेलन मार्फत पत्रकार दाहालले लेखेको रिपोर्टलाई झ्यास भन्दै पूरा पनि नपढेको प्रतिक्रिया जनाएका थिए ।

मेयर साम्पाङको यही शैलीप्रति धरानका सञ्चारकर्मीले शुक्रबार मन्त्री लेखकलाई ध्यानकर्षण पत्र बुझाएका हुन् ।